ერთად გავაძლიეროთ ინკლუზიური ფსიქოლოგიური დახმარების სერვისი
მიზანი
შეზღუდული შესაძლებლობის მქონე პირების საზოგადოებრივ ცხოვრებაში მონაწილეობის გაზრდის მხარდაჭერა ინკლუზიური ფსიქოლოგიური დახმარების სერვისის განვითარების გზით. აღნიშნული მიზნის მიღწევა ხელს შეუწყობს შეზღუდული შესაძლებლობის მქონე პირების თვითშეფასების ამაღლებას და დამოუკიდებელი ცხოვრებისთვის საჭირო უნარების განვითარებას, რაც საბოლოოდ უზრუნველყოფს მათ სოციალურ ინტეგრაციას და თვითრეალიზაციას.
პროექტი ხორციელდება თბილისსა და კახეთის რეგიონში (თელავის მუნიციპალიტეტი).
შედეგი
1. ინკლუზიური ფსიქოლოგიური დახმარების ბარიერების სისტემური ანალიზი - განხორციელდება ფსიქოლოგიური სერვისების მიღებასა და მიწოდებასთან დაკავშირებული ინსტიტუციური, პროფესიული და გარემოს ბარიერების კომპლექსური იდენტიფიცირება. კვლევის მიგნებები საფუძვლად დაედება ინკლუზიური ფსიქოლოგიური მომსახურების მინიმალური სტანდარტის და სტანდარტის დანერგვის სახელმძღვანელოს შექმნას.
2. ინსტიტუციური თანამშრომლობა და პოლიტიკის დონეზე ადვოკატირება - შემუშავებული სტანდარტი წარედგინება შესაბამის სახელმწიფო უწყებებსა და გადაწყვეტილების მიმღებ პირებს. დაიგეგმება თანამშრომლობის მექანიზმები სტანდარტის „დამოუკიდებელი ცხოვრების ცენტრების“ მომსახურების ჩარჩოში ინტეგრირებისთვის, რაც უზრუნველყოფს პოლიტიკის დონეზე მდგრად ცვლილებებს.
3. პროფესიული კადრების გაძლიერება და გრძელვადიანი მდგრადობა - ინკლუზიური ფსიქოლოგიური დახმარების პირველი ტრენინგ მოდულის შექმნა ერთის მხრივ პროექტის ფარგლებში ხელს შეუწყობს პრაქტიკოსი ფსიქოლოგებისა და სტუდენტების პროფესიული შესაძლებლობების გაძლიერებას და მეორეს მხრივ აკადემიური და პრაქტიკული კომპონენტებით დატვირთული სასწავლო მოდული, პროექტის დასრულების შემდეგაც დარჩება ღია რესურსად პროფესიული საზოგადოებისთვის, რაც უზრუნველყოფს ინოვაციური მიდგომების ხანგრძლივ მდგრადობას.